Наскрізний зріз української історії від найдавніших часів до сьогодення

Літопис про боротьбу руських князів за київський стіл (1238 р.)

В лето 6746. Михаил бежа по сыну своемь перед Татары во Угры, а Ростислав Мьстиславичь Смоленьского седе Кыеве. Данил же еха на нь и я его, и остави в немь Дмитра, и вдасть Кыев в руце Дмитрови обьдержати противу иноплеменьных язык, безбожьных Татаров. Яко бежал есть Михаил ис Кыева в Угры, [Ярослав] ехав я княгиню его и бояр его пойма, и город Каменець взя. Слышав же се Данил, посла слы, река: «пусти сестру ко мне, зане яко Михаил обеима нама зло мыслить»; и Ярослав услыша словеса Данилова, и бысть тако, и приде к нима сестра к Данилу и Василку, и держаста ю во велице чести. Король же не вдасть девкы своей Ростиславу, и погна и прочь. Идоста Михаил и Ростислав ко уеви своему в Ляхы и ко Кондратови. Приела бо Михаил слы Данилу и Василку, река: «многократы согрешихова и многократы пакости творях ти, что ти обещах и того не створих; аще коли хотях любовь имети с тобою, невернии Галичане не вдадяхут[ь] ми; ныне же клятвою клянутися, яко николиже вражды с тобою не имам имети»; Данил же и Василко не помянуста зла, вдаста ему сестру и приведоста его из Ляхов. Данил же с[о]вет створи со братом си, обеща ему Киев Михаилови, а сынови его Ростиславу вдасть Луческ; Михаил же, за страх Татарьскый, не сме ити Кыеву. Данил же и Василко вдаста ему ходити по земле своей, и даста ему пшенице много, и меду и говяд и овець доволе. Михаил же уведев приятье Киевьское, и бежа со сыном своим во Ляхы Кондратови, приближившимжеся Татаром, то не стерпе туто, иде в землю Воротьславьску, и приде ко месту Немецкому, именемь Середа; узревши же Немци, яко товара много есть, избита ему люди и товара много отьяша, и унуку его убиша; Михаилу иже не дошедшю и собравшюся, и бысть в печали велице, уже бо бяхуть Татари пришли на бой ко Иньдриховичю; Михаил же воротися назад опять Кондратови. [...]