Наскрізний зріз української історії від найдавніших часів до сьогодення

Універсал Івана Самойловича про відправку комонного полковника Ілляша Новицького з полком до Дніпра для захисту Лівобережжя (1676 p., липня 31)

Всей старшине и черне Войска царского пресветлого величества Запорозкого, по городах и селах знайдуючойся, и всем, кому о том належит ведати, ознаймуем сим нашим писанем, иж маючи мыпевную ведомост и пересторогу от многих певных и нам зычливых особ, же давный внутреный ворог Дорошенко, як перед тым по все часы не о що иншое старався, толко абы завше своим затяганем бесурмян, и з нами з едноченемся могл людем невинным в спокойном мешканю зашкодити, так и тепер не погамовавшися, от тое иж превратности своей злохитрой и завзятости злобливой по стародавнему затягнул до себе част орды з Крыму для зашкоженя краеви нашому, иж якобы при нем оная поблизу Чигрина зостает. Теды стараючися мы о ненарушную целост краю нашого и запобегаючы злому неприятелскому намереню, жебы не захотел той то неприятел на сей бок вторгнути, и надячися под сей час робочий, в полю людей убезпечоных заставши, ушкодити, умыслне от боку нашого пана ИляшаНовицкого, полковника комонного, зо всем полком его там ку Днепру для встренту и постраху неприятелей выправуем. И приказалисмо оному, абы прибувши там, в полку Лубенском, коло Яблонова, зсвоим полком станул, и з ким належит, ведлуг и информации нашой зносячися, мел всюду пилное око, и о замислах и поступках неприятелских засягаючи ведомостей, поки там зоставатимет до указунашого, як найпрудшей нам давал знати. Зачым кгди звышмененный пан полковник наш на певное месце за указом нашым простуючи, где колвек, так в дорозе, по городах, яко и на самом том месцу, по старшине якой повелности потребоватимет, абы оному намней не отмовляючыся, оную виодвечано, для ласки нашой пилно жадаєм и приказуєм.